Сяргей Рублеўскі напісаў кнігу пра першыя на Беларусі акцыі маўклівага супраціву
На мінулым тыдні вядомы віцебскі журналіст і літаратар Сяргей Рублеўскі прэзентаваў сваю новую кнігу “Маўчанне на ўвесь Божы свет”. Твор прысвечаны маўкліваму пратэсту жыхароў Лепельскага раёна пад час усесаюзнага перапісу 1937 году.
У 1937 годзе ў СССР прайшоў перапіс насельніцтва, які потым быў прызнаны дэфектным, а супрацоўнікі ўпраўлення, якое праводзіла перапіс, рэпрэсаваныя. Пад час перапісу 230 чалавек з 52 сямей Стайскага і Пышнянскага сельсаветаў Лепельскага раёна адмовіліся адказваць на пытанні — у прысутнасці пераспісчыкаў яны зацята маўчалі.
Сяргей Рублеўскі вывучыў шэраг архіўных дакументаў, асвятляючых перапіс 1937 года на Лепельшчыне, а таксама здолеў сустрэцца з дзецьмі “лепельскіх маўчальнікаў”. Гэтыя матэрыялы і ляглі ў аснову кнігі “Маўчанне на ўвесь Божы свет”.