Каляднае віншаванне віцебскага біскупа Алега Буткевіча

Віншаванне са святам Божага Нараджэння ад біскупа Віцебскай дыяцэзіі каталіцкага касцёла Алега Буткевіча.
Віцебскі біскуп Алег Буткевіч. Фото Сержука Серабро

«Хвала на вышынях Богу, а на зямлі супакой людзям добрай волі!»

Гэтым спевам анёлаў была абвешчана радасная навіна пра нараджэнне ў горадзе Давідавым Бэтлееме Божага Сына. Кожную нядзелю святы паўтарае гэты гімн, нагадваючы свету праўду аб прысутнасці Бога на зямлі. «Слова сталася Целам і пасялілася між намі…» (Ян 1,14). Яно нясе свету радасць даравальнай Божай Любові, якая ніколі не пакідае чалавека. Мы пакліканыя прыняць яе ў сваё жыццё і навучыцца дзяліцца ёю з іншымі, такім чынам заносячы святло Бэтлеемскай зоркі тым, хто знаходзіцца яшчэ ў змроку нянавісці, недаверу, самоты, безнадзейнасці.

Свята Божага Нараджэння — гэта асаблівы час, калі мы прыгадваем, што зямля не проста прымае Божага Пасланніка, але становіцца Яго жытлом назаўсёды. У такім «суседстве» не можа чалавек адчуваць сябе самотным і пакінутым, ён не павінен планаваць злачынства і крыўды. Аднак гэтае «суседства» становіцца адчувальным толькі праз тых, хто па прыкладзе Дзевы Марыі згаджаецца на Божую волю, прымаючы шчырым сэрцам Добрую Вестку.

Няхай Божае Нараджэнне прынясе нам так патрэбны спакой і духоўную сілу, каб зло, якое існуе ў свеце, не знаходзіла больш месца ў сэрцах людзей. Бо іх сэрцы прызначаныя быць утульнай калыскай для Збаўцы, Каторы прыходзіць у гэты свет. А прынесеныя Ім бласлаўленне і ласка няхай будуць крыніцай радасці і трывалай надзеі.

Са святам Божага Нараджэння!

Відэа “Каталіцкага весніка”.


Меткі: , ,

Падобнае

    2 каментарыя

    1. Pcholkin   Thumb up Thumb down +3
      24/снежань/2016 у 22:58

      Са святам, спадарство!

    2. cinic   Thumb up Thumb down +3
      25/снежань/2016 у 15:02 1

      Усіх, хто святкуе, са святам!

    Каментаваць