Фэст у Дунілавічах

29 верасня ў дзень святых арханёлаў Міхала, Габрыэля і Рафала ў парафіі Найсвяцейшай Тройцы ў Дунілавічах адбыўся фэст. На свята прыйшлі парафіяне і прыехалі святары з розных дэканатаў. Цікава, што, мабыць, уперашыню ў Віцебскай дыяцэзіі загучалі Гадзінкі ў гонар св. Арханёла Міхала.
Фэст у Дунілавічах. Фота кс. Паўла Самсонава

Вернікі маліліся гэтай прыгожай малітвай у суправаджэнні парафіяльнага хора, якім дырыгаваў Зміцер Гарэлаў, навучэнец Каталіцкага Універсітэта ў Любліне, Польшча. Смела можна сказаць, што выкананне такога рэдкага спеву вернікамі ў Дунілавічах – гэта яго заслуга.

Фэст у Дунілавічах. Фота кс. Паўла Самсонава

Святую Імшу цэлебраваў кс. дэкан Андрэй Возьняк з Паставаў. Канцэлебравалі прысутныя святары. Слова Божае прамовіў кс. Віктар Місевіч. Ён прысвяціў гамілію праблеме рэлігійнай інфантыльнасці і засяродзіўся над роляй анёлаў у збаўленні чалавека. Пасля Эўхарыстыі і словаў падзякі пробашча кс. Паўла Самсонава адбылася Эўхарыстычная працэсія. Сабраныя вернікі прасілі перад Найсвяцейшым Сакрамэнтам заступніцтва святых арханёлаў, была прачытаная Літанія да св. Міхала Арханёла.

Фэст у Дунілавічах. Фота кс. Паўла СамсонаваФэст у Дунілавічах. Фота кс. Паўла Самсонава

Варта адзначыць, што гонарам Дунілавіцкай парафіі з’яўляецца гатычная манстранцыя – рэдкасць у беларускіх парафіях. Падчас атэістычных ліхалеццяў вернікі ў сваіх хатах з пашанай захоўвалі святое начынне і цяпер яно змяшчае ў сабе бясцэнную каштоўнасць – жывога Езуса ў постаці хлеба.

Фэст у Дунілавічах. Фота кс. Паўла Самсонава

Сённяшні свет патрабуе магутнага заступніцтва. Нашая краіна Беларусь аддадзеная ў апеку св. Міхалу Арханёлу. Молімся, каб споўніліся словы малітвы:
“Святы арханёле Міхале, Князю войска нябеснага, моцаю Божаю скінь у пекла сатану і іншых злых духаў, якія на згубу душаў снуюць па свеце. Паспрыяй, каб мы праз усю вечнасць былі вернымі твайму закліку «Хто ж, калі не Бог!» Амэн.”

Фэст у Дунілавічах. Фота кс. Паўла Самсонава


Меткі: , ,

Падобнае

    Каментаваць