Баль у гонар Агінскага
У Беларускім тэатры “Лялька” перад пачаткам вячэрняга спектакля сёння прайшла танцавальная вечарына, прысвечаная 245-годдзю з дня нараджэння вядомага беларускага музыканта Міхала Клеафаса Агінскага.
Удзельнікі ансамбля “Перапёлачка” з гімназіі №3 Віцебска (кіраўнік Валянціна Вішнеўская) перанеслі гледачоў у пачатак ХІХ стагоддзя, калі дамы і кавалеры танчылі вальс, паланэз, мазурку... Выкладчыца музычнай школы №2 Галіна Збуржынская выканала дзве музычныя кампазіцыі – “Паланэз Шапэна” і і несмяротны паланэз “Развітанне з Радзімай”.
Вядучымі баля былі Генадзь Агафонаў – у вобразе Агінскага, і педагог-арганізатар тэатра “Лялька” Крысціна Бондарава – у ролі Марыі, жонкі кампазітара.
У апошні час у “Ляльцы” ўдала спалучаюць сцэнічнае і харэаграфічнае мастацтва. Нагадаем, што ў мінулую нядзелю ў тэатры з вялікім поспехам прайшоў майстар-клас па беларускіх народных танцах.
Даведка “ННВ”: Князь Міхал Клеафас Агінскі быў рознабакова адораным чалавекам – ён быў не толькі кампазітарам, але і паэтам, мастаком, архітэктарам, дыпламатам, дзяржаўным дзеячам. Агінскі быў першым, хто напісаў паланэзы для танцаў, а не для слухання. Дарэчы, пры жыцці музыканта самым выдомым ягоным творам было не “Развітанне з Радзімай”, а твор з сумнай назвай “Паланэз смерці”. А назву паланэзу, які назаўжды праславіў яго, даў не сам аўтар, а ўдзельнікі паўстання 1830 года.
З твораў Міхала Клеафаса на сённяшні дзень вядомы 20 паланэзаў, 4 маршы, 4 вальсы, 3 мазуркі, галоп, менуэт, шматлікія рамансы, опера “Зеліда і Валькур, або Банапарт у Каіры”, напісаная на ўласнае лібрэта.
