Сустрэча ў спадчыне Сапегі
Лепель у чарговы раз стаў месцам сустрэчы духавенства з усёй Віцебскай дыяцэзіі. Адбылося гэта 9 лістапада ў Свята гадавіны пасвячэння Латэранскай базылікі. Святары, манахі і манахіні сабраліся ў касцёле, каб аднавіцца духоўна праз сакрамэнт споведзі і эўхарыстыі.
Цэлебраваў св. Імшу біскуп Віцебскі Уладзіслаў Блін. Ён падкрэсліў важнасць такіх штомесячных сустрэч і падзякаваў усім за адданую працу.
Словы казання да сабраных скіраваў а. Марэк Пасют OFMCap, пробашч Докшыцкай парафіі. Нагадваючы пра сэнс перажыванага свята, айцец заахвоціў святароў і сясцёр да трываласці ў Хрысце і ўмацавання ў цнотах.
Айцец Раман Шульц, дамініканін, у канферэнцыі распавёў пра магчымыя памылкі, якія могуць паўстаць пры пабудове супольнасці.
Было шмат арганізацыйных пытанняў. Кс. Вячаслаў Барок распавёў пра планы новых пілігрымак па святых месцах Еўропы.Кс. Раман Мурзіч, канцлер дыяцэзіі, нагадаў прысутным пра юбілей біскупскай сакры ардынарыя дыяцэзіі, які будзе святкавацца 20 лістапада.
Апладысментамі святары і сёстры віталі навіну з вуснаў с. Фабіяны Патшонсай MSF пра з’яўленне падручнікаў па рэлігіі. Адметна тое, што яны распрацаваныя для ўсіх дыяцэзій Беларусі і выдадзены на беларускай мове. Гэта сапраўды бясцэнны ўклад у развіццё катэхезы ў Касцёле на Беларусі.
Пасля духоўнай часткі гаспадар парафіі кс. Андрэй Аніскевіч запрасіў усіх на абед. Ён парупіўся, каб кожнаму было ўтульна на сустрэчы і ніхто не застаўся галодны. Хочацца нагадаць, што не так даўно менавіта стараннямі пробашча Лепельскай парафіі ў горадзе з’явіўся помнік легендарнаму Льву Сапегу канцлеру Вялікага Княства Літоўскага. З’явілася таксама вуліца яго імя. Гэта таксама дастойны прыклад руплівасці мясцовых уладаў пра гістарычную спадчыну Лепеля, мецэнатам якога і з’яўляўся Леў Сапега.
Наступная сустрэча духавенства Віцебскай дыяцэзіі пройдзе ў снежні ў Наваполацку.
