Студэнты медыцынскага універсітэта падаравалі малышам з дзіцячага дому казку
29 сакавіка ўдзельнікі валанцёрскага студэнцкага руху ВДМУ “Сэрца на далоні” вадзілі малышэй з дзіцячага дому г.Віцебска на спектакль у “Беларускі тэатар “Лялька”.
Сорак дзетак, выхаванцаў дзіцячага дому, ва ўзросце ад чатырох да васьмі год паглядзелі чароўную казку Г.Х.Андэрсана “Прынцэса і Свінапас”. Пасля спектаклю хлопчыкаў і дзяўчынак чакала цікавая экскурсія па тэатры, на якой яны змаглі ўбачыць і дакрануцца да казачных лялек. Яшчэ адным яскравым уражаннем для дзяцей стала само аўтобуснае падарожжа па горадзе. Грошы на квіткі ў тэатар сабралі валанцёры медыцынскага універсітэта. Універсітэт падаў і аўтобус для дзетак. Разам з малышамі ўвесь час былі клапатлівыя і ўважлівыя студэнты.
У бліжэйшых планах “Сэрца на далоні” два падобныя мерапрыемствы: паход у “Ляльку” з дзецьмі з Вялікалётчанскага дзіцячага дому і дзіцячага сацыяльнага прытулку.