«Ямелева шчасце» на новы лад
Сёння адзначаецца Міжнародны дзень артыста-лялечніка. Віцебская “Лялька” адзначыла свята новым спектаклем – 21 сакавіка ў тэатры адбылася здача новай пастаноўкі для дзяцей “Ямелева шчасце”.
Калі быць дакладным, то гэта не новы, а стары новы спектакль. Гэта пастаноўка раней мела іншую назву – “Казка пра Ямелю”, і ішла ў “Ляльцы” напрацягу 20 гадоў. А сёлета мастацкі кіраўнік тэатра Віктар Клімчук вырашыў аднавіць спектакль. У пастаноўцы цалкам змяніўся акцёрскі склад – на сцэну зараз выходзяць Вольга Маханькова, Аляксей Макарскі, Вольга Лазебная, Наталля Гайдук, Сяргей Талкач, Валерый Зімніцкі, Міхаіл Клімчук. Іншымі таксама сталі дэкарацыі, лялькі і касцюмы.
П’есу Лізаветы Тарахоўскай паводле рускіх народных казак на беларускую мову пераклаў Пятро Ламан. Над сцэнаграфіяй спектакля працаваў Аляксандр Сідараў, над лялькамі і касцюмамі – Ганна Сідарава. Музыку да пастаноўкі напісаў кампазітар Алег Залётнеў, харэаграфічныя нумары ажыццявіла Дзіяна Юрчанка.